SNLD ပါတီအား ကြားဖြတ် ရွေးကောက်ပွဲတွင် လုပ်ကြံ ဖန်တီးထားသည့် စွပ်စွဲချက် ပြုလာနိုင်သည့် အလားအလာများ တွေ့ရသဖြင့် သံတမန်များ၊ မီဒီယာများ၊ အရပ်ဘက် အဖွဲ့အစည်းများ လေ့လာစောင့်ကြည့်ပေးရန် SNLD ပါတီဖိတ်ခေါ်
ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီအား ကြားဖြတ် ရွေးကောက်ပွဲတွင် လုပ်ကြံဖန်တီးထားသည့် စွပ်စွဲချက်များဖြင့် စွပ်စွဲချက် ပြုလုပ်လာနိုင်သည့် အလားအလာများ တွေ့ရှိရသဖြင့် သံတမန်များ၊ မီဒီယာများ၊ အရပ်ဘက် အဖွဲ့အစည်းများ လေ့လာစောင့်ကြည့်ပေးရန် SNLD ပါတီက ဖိတ်ခေါ်ကြောင်း ဖေဖော်ဝါရီ ၂ ရက်တွင် ကြေညာချက် ထုတ်ပြန်သည်။
အဆိုပါ ကြေညာချက်၌ SNLD ပါတီအနေဖြင့် ၂၀၁၇ ခုနှစ် ဧပြီ ၁ ရက်တွင် ကျင်းပတော့မည့် ကြားဖြတ် ရွေးကောက်ပွဲတွင် ပါဝင်ယှဉ်ပြိုင်ရန်အတွက် ကျိုင်းတုံမြို့နယ်၊ ကျေးသီးမြို့နယ်၊ မိုင်းရှူးမြို့နယ်များတွင် အမည်စာရင်းများ တင်သွင်းထားပြီး ဖြစ်ကြောင်း၊ ယင်းသို့ ရွေးကောက်ပွဲ တင်မြှောက်နိုင်ရန် ယှဉ်ပြိုင်ရာ၌ သတ်မှတ်ထားသည့် ဥပဒေပြဋ္ဌာန်းချက်များကို အတိအကျ လိုက်နာဆောင်ရွက်ရန်၊ ဥပဒေပြင်ပ ကိစ္စမှန်သမျှ လုံးဝရှောင်ကြဉ်ရန် မိမိတို့၏ သက်ဆိုင်ရာ အောက်ခြေ အဖွဲ့အစည်း အသီးသီးထံသို့ တိတိကျကျ ညွှန်ကြားထားပြီး ဖြစ်ကြောင်း ဖော်ပြထားသည်။
ထိုသို့ မိမိတို့ဘက်မှ အတိအကျ လိုက်နာရန် ညွှန်ကြားထားသော်လည်း မဟုတ်မမှန် လုပ်ကြံဖန်တီးထားသည့် စွပ်စွဲချက်များဖြင့် သက်ဆိုင်ရာ ရွေးကောက်ပွဲ ဥပဒေများကို အသုံးချပြီး စွဲချက်ပြုခြင်းများ ပြုလုပ်လာနိုင်သည့် အလားအလာများကို တွေ့ရှိလာနေရကြောင်း SNLD ၏ထုတ်ပြန်ချက်တွင် ပါရှိသည်။
ယင်းကဲ့သို့ ကိစ္စရပ်များ ပေါ်ပေါက်လာနိုင်သည့် အလားအလာများကို ကြိုတင်ကာကွယ်သည့် အနေဖြင့် ကြားနေ အဖွဲ့အစည်းများ ဖြစ်ကြသည့် သံတမန်များ၊ စာနယ်ဇင်းနှင့် အသံလွှင့်ဌာနများ စသည့် သတင်းမီဒီယာများ၊ အရပ်ဘက် လူမှုအဖွဲ့အစည်းများ၊ လူထုအခြေပြု အဖွဲ့အစည်းများ အားလုံးကို ရွေးကောက်ပွဲ မတိုင်မီနှင့် ရွေးကောက်ပွဲ ကာလမှသည် ရွေးကောက်ပွဲ ပြီးစီးသည့် ကာလအထိ မိမိတို့ပါတီမှ ၀င်ရောက် ယှဉ်ပြိုင်ကြသည့် ဒေသများသို့ လာရောက်ပြီး အခြေအနေမှန်များကို သိရှိနိုင်ရန်အတွက် လေ့လာစောင့်ကြည့် ပေးကြပါရန် လေးစားစွာဖြင့် ဖိတ်ခေါ် တိုက်တွန်းကြောင်း ကြေညာချက်တွင် ရေးသားထားသည်။
“ပြီးခဲ့တဲ့ ရွေးကောက်ပွဲမှာ ၂၀၁၅ အထွေထွေ ရွေးကောက်ပွဲမှာ မြို့နယ်တော်တော်များများမှာ ကျွန်တော်တို့ရှမ်းပြည်နယ် တောင်ပိုင်းနဲ့ မြောက်ပိုင်းမြို့နယ် တော်တော်များများမှာ ကျွန်တော်တို့ အောင်နိုင်ခဲ့တယ်။ ဒါပေမဲ့ ဥပမာ လင်းခေးမှာဆိုရင် SNLD နိုင်တယ်။ ဒါပေမဲ့ ပြိုင်ဘက်ပါတီ တစ်ခုကနေ ပြီးတော့မှ သူရဲ့အခြား ပြိုင်ဘက်ပါတီ အကုန်လုံးကို မတရား ပြုကျင့်ပါတယ် ဆိုပြီးတော့မှ တရားမဲ့ပြုကျင့်တယ် ဆိုပြီးတော့ စွပ်စွဲတာတွေ ရှိတယ်ပေါ့နော်။ အဲဒီလို အပြန်အလှန် စွပ်စွဲထားတဲ့ အနေအထားမျိုး ရောက်တယ်။ နောက်ပါတီ ကျတော့လည်း အောင်နိုင်သွားတဲ့ ပါတီတွေက အခြားအဖွဲ့အစည်း တစ်ခုခုရဲ့ အင်အားသုံးပြီးတော့မှ အနိုင်ယူသွားတာတို့ ဘာတို့ အဲဒီလိုမျိုး စွပ်စွဲတာတွေ။ ပြစ်တင်တာတွေ ကျွန်တော်တို့ ကြားရတာပေါ့နော်။ အဲဒီတော့ အဲဒီလိုမျိုး တစ်ဖက်က မစွပ်စွဲရအောင်၊ နောက်အနိုင်ရပါတီက ရှင်းရှင်းလင်းလင်း လိပ်ပြာသန့်သန့်နဲ့ လွှတ်တော်ထဲ ၀င်နိုင်အောင်ဆိုလို့ရှိရင် တစ်ဖက်နဲ့တစ်ဖက် အမြင်မကွဲကြဖို့ လိုအပ်တယ်။ အဲဒီအခါကျရင် ရွေးကောက်ပွဲ မတိုင်ခင်ရော၊ ရွေးကောက်ပွဲ လုပ်နေဆဲ ကာလရော၊ ပြီးဆုံးသွားတဲ့ အချိန်ထိပေါ့။ အဲဒီမှာ မီဒီယာရော၊ သံတမန် အသိုင်းအ၀ိုင်းရော အစရှိတဲ့ Third Party က ၀င်ပြီးတော့မှ ပွင့်လင်းမြင်သာ ရှိပါတယ်ဆိုတာကို သက်သေခံပေးနိုင်လို့ရှိရင် မလိုလားအပ်တဲ့ ပြဿနာတွေ မရှိလာနိုင်ဘူးပေါ့ဗျာ။ အဲဒီလို ရည်ရွယ်ချက်နဲ့ ဒီကြေညာချက်ကို ထုတ်ခြင်းဖြစ်ပါတယ်” ဟု SNLD ပါတီတွဲဖက် အတွင်းရေးမှူး (၁) ဦးစိုင်းလိတ်က ပြောကြားသည်။
ကြားဖြတ် ရွေးကောက်ပွဲတွင် ရှမ်းပြည်နယ်၌ လစ်လပ် မဲဆန္ဒနယ်များမှာ ကျေးသီးမြို့နယ် ပြည်သူ့လွှတ်တော် မဲဆန္ဒနယ်၊ မိုင်းရှူးမြို့နယ် ပြည်သူ့လွှတ်တော် မဲဆန္ဒနယ်၊ ကျေးသီးမြို့နယ် ပြည်နယ်လွှတ်တော် မဲဆန္ဒနယ်အမှတ် (၁) နှင့် အမှတ် (၂)၊ မိုင်းရှူးမြို့နယ် ပြည်နယ်လွှတ်တော် မဲဆန္ဒနယ် အမှတ် (၁) နှင့် အမှတ် (၂)၊ ကျိုင်းတုံမြို့နယ် ပြည်နယ် လွှတ်တော် မဲဆန္ဒနယ် အမှတ် (၂)၊ ညောင်ရွှေမြို့နယ် ပြည်နယ်လွှတ်တော် မဲဆန္ဒနယ်အမှတ် (၁) တို့ဖြစ်သည်။
ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) အနေဖြင့် အဆိုပါ လစ်လပ်မဲဆန္ဒနယ် ရှစ်နေရာအနက် ညောင်ရွှေမြို့နယ် ပြည်နယ်လွှတ်တော် မဲဆန္ဒနယ် အမှတ် (၁) မှလွဲ၍ ကျန်မဲဆန္ဒနယ်များတွင် ပါဝင်ယှဉ်ပြိုင်မည်ဖြစ်သည်။